Cervo convoca a primeira praza municipal de intelixencia artificial

O Concello de Cervo convocou un proceso selectivo para cubrir en propiedade, como persoal funcionario de carreira, unha (1) praza de Técnico/a Superior en Transformación Dixital e Intelixencia Artificial (subgrupo A1), mediante o sistema de concurso-oposición libre. A decisión adoptouse por Resolución de Alcaldía núm. 2026-0751, do 19 de agosto de 2026, e publicouse no Boletín Oficial da Provincia de Lugo núm. 194, do 26 de agosto de 2026 (referencia R. 2284).

Trátase da primeira praza deste perfil convocada nun concello da provincia de Lugo, cunha dotación orzamentaria no vixente Orzamento Xeral e unha xornada completa. A praza está incluída na modificación da Oferta de Emprego Público correspondente ao exercicio 2023, aprobada por Resolución de Alcaldía núm. 2026-0021, do 16 de xaneiro de 2026, e publicada no BOP núm. 017, do 22 de xaneiro de 2026.

Un perfil técnico e xurídico para a administración intelixente

O posto, encadrado na Escala de Administración Especial, Subescala Técnica, Clase Técnico/a Superior, ten como eixo a integración da intelixencia artificial e das novas tecnoloxías nos procedementos administrativos municipais. Entre as súas funcións destacan:

• Asesoramento técnico-xurídico á Alcaldía e aos servizos municipais para a incorporación da IA nos procedementos.
• Análise e priorización dos procedementos susceptibles de automatización e elaboración de memorias de impacto, viabilidade, gobernanza e supervisión.
• Redacción de informes sobre a conformidade dos sistemas de IA co Regulamento (UE) 2024/1689 (Regulamento de IA), o Esquema Nacional de Seguridade (Real Decreto 311/2022) e a normativa de protección de datos.
• Elaboración de pregos para a contratación pública tecnolóxica e coordinación da gobernanza de datos e da supervisión humana dos sistemas.

Requisito específico de acreditación en IA

Ademais dos requisitos xerais (nacionalidade, capacidade, titulación universitaria de Grao ou equivalente e coñecemento do galego no nivel CELGA 4), as bases esixen unha acreditación específica de coñecementos mínimos en intelixencia artificial aplicada ao sector público e en transformación dixital, con carácter alternativo e taxado:

• Vía A: estar en posesión dun máster universitario oficial ou título propio, cun mínimo de 60 créditos ECTS, no que polo menos a metade versen sobre IA, ciencia de datos, transformación dixital, dereito dixital ou ciberseguridade.
• Vía B: acreditar experiencia profesional de polo menos dous anos en funcións de asesoramento, supervisión ou auditoría de cumprimento do ENS, redacción de pregos con aplicación do Regulamento (UE) 2024/1689, avaliación de impacto algorítmica ou supervisión humana de sistemas de IA de alto risco.

A ausencia desta acreditación determinará a exclusión do proceso, por tratarse dunha capacidade mínima imprescindible para o desempeño do posto.

Prazo e proceso selectivo

As solicitudes presentaranse no prazo de 20 días hábiles contados desde o día seguinte á publicación do anuncio de convocatoria no Boletín Oficial do Estado (BOE), de forma telemática a través da sede electrónica do Concello de Cervo ou polos medios previstos no artigo 16.4 da Lei 39/2015. O proceso articúlase ao abeiro do artigo 70 do Real Decreto Lexislativo 5/2015 (TREBEP) e dos artigos 45 e 48 da Lei 2/2015 (LEPG).

A fase de oposición, obrigatoria e eliminatoria, consta de tres exercicios: un cuestionario teórico de 100 preguntas sobre transformación dixital, ciberseguridade e IA (incluído o Regulamento (UE) 2024/1689 e a ética algorítmica), un exercicio teórico-práctico sobre administración e lexislación aplicable, e un terceiro exercicio específico sobre a aplicación da IA e as novas tecnoloxías na xestión administrativa. A fase de concurso valorará os méritos alegados, cunha ponderación do 75% para a oposición e do 25% para o concurso.

A convocatoria, asinada pola alcaldesa-presidenta, María Dolores García Caramés, supón un paso adiante na modernización da administración local lucense, ao dotar a Cervo dun técnico especializado capaz de garantir o cumprimento do novo marco normativo europeo de IA e impulsar a transformación dixital dos servizos municipais.

Fuente: Boletín Oficial da Provincia de Lugo, núm. 194, 26 de agosto de 2026, páx. 77 (referencia oficial: R. 2284).